'నో షుగర్' అని చెప్పి అమ్మకాలు.. పలు సంస్థల బండారం బయటపెట్టిన 'ఎఫ్ఎస్ఎస్ఏఐ'

వినియోగదారులను తప్పుదోవ పట్టించే ప్రకటనలు, తప్పుడు లేబులింగ్, నాణ్యతా లోపాలపై భారత ఆహార భద్రత, ప్రమాణాల ప్రాధికార సంస్థ (ఎఫ్ఎస్ఎస్ఏఐ) కఠినంగా వ్యవహరించింది. కిండర్ జాయ్, సఫోలా, బికనీర్‌వాలా వంటి పలు ప్రముఖ ఆహార వ్యాపార సంస్థలకు (FBOs) నోటీసులు జారీ చేసింది. ఆహార భద్రత, ప్రమాణాల చట్టం-2006 ప్రకారం ఈ చర్యలు తీసుకున్నట్లు సోషల్ మీడియా ప్లాట్‌ఫామ్ 'ఎక్స్' ద్వారా ఎఫ్ఎస్ఎస్ఏఐ వెల్లడించింది. వినియోగదారుల నుంచి వచ్చిన ఫిర్యాదులు, ఉత్పత్తులపై చేస్తున్న మోసపూరిత ప్రచారాలను తీవ్రంగా పరిగణించినట్లు తెలిపింది.

తప్పుడు క్లెయిమ్స్‌తో మోసం
ఆహార భద్రత, ప్రమాణాల (ప్రకటనలు, క్లెయిమ్స్) నిబంధనలు-2018ను ఉల్లంఘిస్తూ పలు కంపెనీలు చేస్తున్న ప్రచారాలను ఎఫ్ఎస్ఎస్ఏఐ ప్రశ్నించింది. ప్లక్ (Pluckk) కంపెనీకి చెందిన మామిడి పండ్ల రసంపై 'నో యాడెడ్ షుగర్' అని లేబుల్ వేసి, పదార్థాల జాబితాలో చెరకు రసం ఉన్నట్లు చూపడాన్ని తప్పుబట్టింది. ఇది వినియోగదారులను మోసగించడమేనని పేర్కొంది. అదేవిధంగా, ఒక పనీర్ ఉత్పత్తిపై 'నేచురల్ పనీర్' అని పేర్కొనడం కూడా నిబంధనలకు విరుద్ధమని స్పష్టం చేసింది. మిశ్రమ ఆహార పదార్థాలకు 'నేచురల్' అనే పదాన్ని వాడటంపై ఉన్న నిబంధనలను ఇది ఉల్లంఘిస్తుందని తెలిపింది.

నోటీసులు అందుకున్న ఇతర కంపెనీలు
ఫెర్రెరో ఇండియాకు చెందిన 'కిండర్ జాయ్' చాక్లెట్‌పై 'రిచ్ ఇన్ మిల్క్ సాలిడ్స్' అనే క్లెయిమ్‌ను, మారికో కంపెనీకి చెందిన 'సఫోలా టోటల్ హార్ట్ ప్రో' వంట నూనెకు సంబంధించిన బ్రాండింగ్, ఆరోగ్య ప్రయోజనాలపై చేస్తున్న వాదనలను ఎఫ్ఎస్ఎస్ఏఐ ప్రశ్నించింది. వీటితో పాటు గౌర్ హెల్తీ ఫుడ్ (సిల్కెన్ టోఫు), మాస్టర్‌చౌ ఫుడ్స్ ('100% నేచురల్', 'ఫ్రెష్లీ మేడ్' క్లెయిమ్స్) వంటి సంస్థలు కూడా నోటీసులు అందుకున్నాయి. మెడిజెన్ ల్యాబ్స్, నెక్సా ఇండస్ట్రీస్, రా ప్రెజరీ, కొరియన్ జిన్‌సెంగ్ ఉత్పత్తులపై చేస్తున్న ఆరోగ్య ప్రయోజనాల వాదనలకు శాస్త్రీయ ఆధారాలు లేవని, వాటికి అనుమతులు లేవని పేర్కొంది.

పరిశుభ్రత లోపం, కల్తీపై చర్యలు
సోషల్ మీడియా ద్వారా వచ్చిన ఫిర్యాదుల ఆధారంగా కూడా ఎఫ్ఎస్ఎస్ఏఐ చర్యలకు దిగింది. ప్రముఖ మిఠాయిల దుకాణం 'బికనీర్‌వాలా'లో ఒక సిబ్బంది కిచెన్ ఏరియాలో ఆహారం తింటూ పరిశుభ్రతను గాలికొదిలేశారని వచ్చిన ఫిర్యాదుపై నోటీసులు జారీ చేసింది. దీనిపై తీసుకున్న చర్యలు, అంతర్గత విచారణ వివరాలను సమర్పించాలని ఆదేశించింది. అదేవిధంగా, ఐఆర్‌సీటీసీ క్యాటరింగ్ ద్వారా సరఫరా అయిన 'పరం డెయిరీ'కి చెందిన పెరుగు, రబ్రీ ఉత్పత్తులలో ఫంగస్ ఉన్నట్లు వచ్చిన ఆరోపణలపైనా నోటీసులు ఇచ్చింది. ఉత్పత్తి వివరాలు, నిల్వ పద్ధతులు, తీసుకున్న దిద్దుబాటు చర్యలను వివరించాలని కోరింది. నిబంధనలు ఉల్లంఘించిన అన్ని కంపెనీలు వెంటనే దిద్దుబాటు చర్యలు చేపట్టాలని, ఆహార భద్రతా నిబంధనలను కచ్చితంగా పాటించాలని ఎఫ్ఎస్ఎస్ఏఐ స్పష్టమైన ఆదేశాలు జారీ చేసింది.